搬家了

YAHOO BLOG通知將會關門大吉，搞到好多yahoo blog友都紛紛搬家，亦逼到我都要搬家。初來報到，咩都唔識，版面又睇唔慣，setting又唔多識，真係要慢慢研究......

 由於我唔識搬blog，所以只可copy & paste，亦都放棄左某d post，希望以後既日子可以繼續同大家一齊share所以野啦~

倒數103天

倒數103日啦~
自從有左wedding logo後，開始整左好多野，鋼印，menu，seating plan，今次係label。上星期淘了一些袋仔及印了logo貼紙準備用來裝飾我的回禮禮物，雖然個logo印得ok，但估唔到個貼紙質地較厚身，我仲以為係普通紙質地，但原來唔係，有d膠膠地既感覺, haha~ 不過隻貼紙好既地方係容易"搣"，就算貼"咩"左，都好易"搣"返出來再貼過。
Logo除左呢d之外，仲有咩可以整呢?

我的褂鞋

上星期經過佐敦，去左睇褂鞋，雖然舖頭既商場較舊，舖頭面積亦唔係太大，但入面就有各式各樣既繡花鞋。

呢間舖頭繡花鞋都幾出名，舖頭外仲貼左好多雜誌刊登訪問既內容。舖頭除左賣褂鞋外，仲有拖鞋、輕便鞋等。當日下午大約2點半去到已經見到有幾個旅客係店內揀鞋添~ 離開時更見到好多旅客專登拜訪呢間舖頭......

雖然我覺得褂鞋款式唔算好多，不過佢繡花係靚既，入面由平底至有踭都有得選擇，而有踭既就貴d。而我一心想揀平底款，幸好又有我size，所以好快就決定買左啦~

登登登登… 俾大家睇下我對褂鞋啦，對鞋又襯唔襯我套褂呢?

HK PW收相簿

香港PW係4月4日已經順利完成，差不多一個月時間終於收晒相，又大約用左一個月時間自己排板加再執少少相。最後由落ORDER到收貨時間都唔駛2星期就收到啦，真係好快呀，quality都唔錯，只怪我排版時整得唔夠好，有d相多左氣白邊，幸好唔太覺眼咋~


比大家睇下成品啦

台灣PW收相啦

大約6月中既時候，星期一下午收到一個電話通知，話凱瑟琳將有件寄到香港，問我邊D時間方便收件，仲有講定運費$900，方便到時收件時俾~


之後等等等，到左星期四早上大約9點半，收到速遞來電話已經收到份件，約我收件時間，而我一早就吩咐好屋企人幫我收件，當然我都預備好9百大銀俾屋企人啦~ 未到12點份2大盒件已經送到我屋企啦~


返到屋企，急不及待拎成品出來睇啦，發現有2個大盒，一個盒放油畫，一個盒放相簿、簽名布等.....

先打開油畫，好靚呀，原來SIZE真係會被CUT成呈正方形，好似當日有人提點咋，如果唔係，其他相就可能CUT到無上或下面D景啦~

之後再睇埋相簿，2本水晶相簿好重，搞到我無心機睇，重到我唔想拎上手睇，之後睇埋張簽名布，一打開覺得顏色偏紅，不過算啦，唔通叫佢地再整過咩......

其他細相簿、大相等都OK。睇晒無問題後，又繼續封箱放埋一邊等遲D送去男友家呢~



~

我的豬牌

昨天, 金價$13800, 同男友忍唔住走左去睇金, 離BIG DAY雖然仲有5個月, 雖然金價仲有機會跌, 但諗到BIG DAY前應該都唔會再跌得太多, 所以就入手買左豬牌, 而豬牌係禮金之一, 所以到過完大禮俾埋禮金, 到時再同父母去選購龍鳳鈪, 金介指等。

我地先去周大福, 試左2款豬, 一隻較細, 一隻又太大, 但最後要去埋其他金行睇完先決定~

然後到左六福, 由於豬牌已經得返2隻款, 所以只試左一款大細size加一條花花鏈。當時時間都差不多晚上10點, 人地都趕住執野收工, 我仲猶豫緊買大定買細, 還是周大福個隻款, 雖然周大福個款靚d, 但價錢又貴d, 所以最後決定係六福買呢~

之後職員拎個豬牌去磅重量, 磅左2次都輕左1厘, 職員都好好減返1厘錢俾我, 由於之前已經係六福vip, 所以手工又有半價優惠, 加上間舖已經無野可以送, 所以再減少少錢俾我。

就係咁, 我只係用左唔夠一個鐘就ko左豬牌啦~

2nd Fitting

昨晚完成左2nd fitting, 發現有d想揀既已經俾人hold左或要waiting list啦~

 

希望3rd fitting時有更好既選擇啦, 琴晚試左十幾件, 比大部份大家睇啦, 大家又覺得邊幾件好d呢?

 

Tiffany blue個件因為無比條belt我試, 所以搵野代替住~

2013.5.20

今日係2013。5。20，代表愛你一生，我愛你的日子。

今日再睇返自己countdown既日子，竟然係188日， 加上我BD係煌府188到擺酒，真係好意頭呢~

就襯今日係呢到同fb公佈比大家知啦

 

我的褂

3月尾的時候跟b2b們去左睇裙褂，一行5人去左冠南華、永隆同錦發，目的本來係陪某位9月結婚的朋友睇褂，但最後竟然同一日3位b2b一齊落訂

我地首先去左冠南華，只有我的朋友試，見到職員係個金色鐵箱到拎套褂出來，感覺好得意，不過睇到d褂都好新淨，可惜呢間唔比人影相。呢間係好出名的舖頭，所以價錢都好貴呢，幾千蚊算係正常價啦

然後，我地出發到永隆，入到去見到有好多人試褂，我地企係到都無人服侍我地，只好等人地走左先敢打搞職員。一場來到，總覺得要試下，所以我試左褂皇同褂后。唔知係咪褂皇size唔太fit身，感覺著左上身好肥咁，而褂后感覺都ok。而呢間個阿姐就不斷要人影相，好搞笑。

最後去錦發，入到去唔係太多人，我地又繼續試。今次我試埋中五福，中五福都ok，但我又略嫌中五福唔夠金，阿姐知道後話有件金d拎比我試，我先發現中五福都有幾種，金龍金鳳，金龍彩鳳等，仲有平腳同蓮花腳分。試左金龍金鳳後，我又幾like，因為好多金，如果結婚當日少金器，著呢件都唔會好失色，哈哈。

試完一輪後，我同另外2個朋友一齊落訂，而我就訂左中五福金龍金鳳，r佢地送睡衣，而價錢又計平左，好開心呀~

之後返到屋企，不斷睇返d相，又開始心郁郁想轉款。最後4月1日同男友再去試，再試多次大五福，問男友意見，佢話都ok，問佢轉唔轉款好，佢又好似無咩意見，點知嫦姐突然轉軚，話大五福夜晚著會好好睇，又大體等。問埋價錢，大五福價錢差不多是中五福的double......

爭扎完一輪，最後款已轉，我租的就係大五福啦~

HK Pre-Wedding

一直諗住去台灣前係香港平平地影一輯pre-wedding，不過世事往往都有d意想不到的事情發生。

話說朋友之前幫襯一間free pre-wedding，感覺唔錯，然後介紹俾我地，本來一直都傾得幾好，突然臨影相前一星期發生左一d事，個攝影師主動要求取消跟我合作，仲答應退訂俾我，所以香港pre-wedding的事煩擾左我幾日

由於我一早已經搵左mua仲俾左訂，雖然金額唔係太多，但我唔想撻訂，唯有搵下其他攝影師有無平平地取代。於是我就同mua講我的pre-wedding要取消，仲問佢有冇其他攝影師介紹，而價錢又係我budget內，佢就話會幫我搵，而同一時間，我自己都不斷去揾自己喜歡的攝影師......

第二天，收到不少攝影師的rate card，價錢合理的就無我期，其他不是out budget就是我不太喜歡他們影相的style。當我心灰意冷的時候，mua跟我講某位幾出名的攝影師可能有我期，當時我都唔敢太大期望，因為那攝影師原價pre-wedding收$18xxx，無可能減到我的budget內。後來mua confirm我那攝影師的報價，其實價錢應該都是mua用他們的友情價代我r回來的....... Package扣除包衫，mua，車，相簿等，budget的而且確在我budget內，所以我無考慮太耐就一口應承了。

係到多謝我的mua - Sylvia Tsui，還有好期待我的大攝影師替我影HK pre-wedding - Jan Wong

DIY簽名筆

好耐無寫BLOG啦，請原諒我的懶惰

最近都無咩新update，只係完成左幾支簽名筆，多謝JUDY的教導，我的簽名筆可以完成。

先為大家講下簽名筆的材料:

筆
絲帶
裝飾物, 如絲花，公仔等
雙面膠紙
熱溶槍

由於無每個step影相，所以整作過程不詳細講啦。

最後俾大家一睹我的簽名筆啦，由於其中2支未完成隻公仔，所以暫時只完成一大半。

我們的婚介

婚介其實一早已經係上年婚展時俾左訂，但我地又一直拖，拖到今年一月先去舖頭再定款同度size等。

仲記得係婚展時，我地首先去左睇PN，試左都有十幾對，但都搵唔到一對好鍾意，有想即刻買的感覺。之後又周圍逛下，去到一間叫forever couple的booth，被佢地廣告的賣點吸引到，90度刻字同免費印fingerprint。咁我地就入去睇下啦，其實款式唔多，但試戴感覺好好，加上又有永久保養，款式仲可以自訂，所以就好快落埋deposit。

到今年一月，我地上佢地舖頭度size同定款，大約到二月就有成品睇，但由於我地仲未套指紋，所以套完指紋後又要再多等約10天。最後終於係三月頭可以拎走我地對婚介啦。

雖然款式唔係好特別，但我地覺得個款襟戴又唔會老套呢~

當然對介指仲有我地既姓名同結婚日子，好鍾意呢~

1st fitting

琴晚終於正式去左hold衫啦，試左十幾件，大部份都係新款，而我之前hold左的款就無俾我試，唯有下次叫佢俾我試多次啦....

去相俾大家估下我最後hold左邊5件啦