決定場地

最後2強皇潮匯同煌府188店，問bf意見，佢話2間都差不多，而我初初怕188店地點唔係咁多人識去，有考慮過中港城個間， 再上網做多d功課，見到好多人讚188店的service，另外又無意中搵到有人對皇潮匯的bad comment，所以我最後決定選擇煌府188店~

而係4月1日，我就同bf去左188店落訂啦~ 個日冇人擺酒，只係見細龐有人擺滿月酒，我見到有3-4pair人好似同d經理傾緊酒席的野，本身我地同個男經理傾緊，之後一位好出名的Apple姐過埋來同我地坐低一齊傾，佢負責開單比我地，佢真係幾多野講，幾搞笑呢~
去左2次188店都唔記得影相，唯有係佢網頁到攞相啦~

選擇場地

由於我圍數約12-15圍，所以我target十幾圍都可以包場的酒樓。其實初初問左好多間酒樓，但佢地都成廿圍先可以包場，所以我的選擇不多，以下就係我的侯選場地:

尖東御苑 - 知道佢地個場可以落維景，但得大廳望到，另佢地有個細廳好似叫半島廳，諗住打去問下min chg，點知佢地話我個期已經full左，得番個大廳 > <

映月樓 - 知道佢地4/F有個廳十幾圍可以包廳，而且仲有維港景

佐敦彩福皇宴 - 佢地當時話個場會新裝修，裝成城堡個樣，有d興趣

中港城皇潮匯 - 佢地有個細廳，當時睇相都算ok~

煌府188店 - 上回講到我hold左的酒樓就係呢間，本來我問既係紅磡煌府鑽石廳，可惜已經full左，所以佢地介紹我去呢間~

最後我同bf只係去左煌府188店同皇潮匯睇場，第一站去皇潮匯，當時大約4點，點知入到門口，發現冇人，係門口等左一陣都冇人出來，見到有d待應經過見到我地都無人理，最後我同bf行入去，見到大廳有人set緊野，見有人經過就主動問佢地可唔可以睇場，之後個男人問我地大約擺幾多圍， 然後就帶我地去細廳睇，佢打開門，入面燈都無開，佢要走去開燈，入面都set晒枱，放左十多張枱，bf睇完都覺得ok冇乜野，但待應好似唔想招呼我地咁，又無帶我地睇下新娘房，周圍睇下。問埋佢價錢，佢只係比左份野我睇，之後我地就走lu~

第二站去煌府188店，入到去見到set晒枱，個場好光猛，d水晶燈幾靚，仲有我至愛的紫色decoration，有個經理見到我地，即係上前來招呼，我地話想來睇場，咁個男經理就即刻遞上卡片問我地幾多圍，我地話大約13圍，佢就話呢個龐啱我地啦，當時個廳又咁啱set左13張枱，佢就同我地講到時d枱都係咁放，因為佢地中間有條柱，佢地話就算我地多圍，佢地都可以盡量set到d枱唔會比條柱遮住。由於當時細場新人未到，男經理帶埋我地去睇間新娘房，仲比我地睇埋個大電視，佢按個掣，個backdrop就拉開，原來個電視係入面，好似好勁咁~ 然後佢仲帶我地睇埋個大場，當時大場已經有人，佢都介紹下個大場比我地睇，真係幾好service。

之後我bf話返去再考慮下，所以個日冇落到訂~

本來叫bf去埋彩福睇場，點知佢話係佐敦，唔係咁鍾意個location，所以又比佢ban左~ 而映月樓最後都無去睇場，原因係我上網睇人comment話樓底矮加上無台，個backdrop又好似好窄咁，所以都係放棄~

求婚介子

每個女仔都期望的求婚過程冇出現係我身上，只可以怪我的honey唔係一個浪漫有情趣的人，相反佢會係一個較現實的人........

同佢過左5年情人節，收左3年花，估唔到求婚會無花收 ><，連求婚介子都要我同佢一齊揀同一齊買，完全無surprise!

慶幸既係佢有做功課去揀隻求婚介子，佢用左半個月係網上搵資料，心目中預左價錢去選購一隻最perfect的鑽戒。就係落訂book左酒席後，佢就帶我去逛金舖睇鑽戒，其實佢之前都帶我去周生生睇過一次，不過個陣只係睇下，帶上手試下邊款鑽戒較適合我~

我地去左六福睇，一坐低sales就問我地想揀咩，咩價錢等。honey講左個價後，sales就拎左幾隻比我地睇，試左幾隻，由50份到一卡都試晒，而最後我都揀左最大粒而價錢都算抵的一隻。多謝honey!

搵場地

2012年3月， 我的另一半終於肯認真同我講結婚啦，雖然唔係正式的求婚，無花，無鑽介，無浪漫的環境，不過自己都好開心，因為佢終於肯開口了。

之後就開始搵擇日同酒席啦。問過屋企人，預計左圍數就立即上網搵酒席資料，問左好多間酒店，酒樓，由於自己圍數又唔多，酒店大多提供function room比我地，亦都因為function room比我感覺唔夠grand加上樓底矮，所以唯有睇酒樓啦。由於我想地點係尖東或尖沙咀區，所以又可以收窄範圍去搵。
後來擇日日子出左左， 有9月、11月及12月(聖誕節)，我問honey意見，佢prefer 11月或12月，而我之前上網睇過話大日子唔好撞生日月份，為左唔會沖我生日月份，所以我選擇左11月。決定左日子，就立即打去2間心水酒樓問有冇期，但結果已經比人book左，之後其中一間酒樓介紹我去佢地另一分店，咁我上網即刻search下個間分店，睇下場地o唔ok呢。係好短的時間內，都未問另一半意見就打去另一間分店叫佢地幫我hold個期呢~